ДУШАНБЕ, 12 фев – Sputnik. Ҷамолиддин Абдуллозода вазири тандурустии Тоҷикистон имрӯз дар нишасти хабарӣ омори гирифторӣ ба вируси корона дар минтақаҳоро ном бурд.
Бино ба иттилои вазир аз ҳама бештар дар вилояти Суғд ин беморӣ ба қайд гирифта шудааст.
"Суғд - 4300, Душанбе - 4100, ноҳияҳои тобеи марказ - 1500, вилояти Хатлон - 1998 ва ВМКБ - 1196", - гуфт Абдуллозода.
Ин дар ҳолест, ки Вазорати тандурустӣ аз гирифтории 13 ҳазору 308 нафар дар саросари кишвар хабар медиҳад.
Аз ин теъдод кунун 13 ҳазору 218 нафар ё 99,3% шифо ёфта, 90 нафар бар асари ин беморӣ фавтидаанд.
Ёдрас мешавем, ки ахиран Эмомалӣ Раҳмон, раисҷумҳури Тоҷикистон зимни ироаи паёми солона ба парлумони кишвар аз пирӯзии кишвар бар вируси корона хабар дод.
Дар баробари ин раисиҷумҳур таъкид кард, ки ин чунин маънӣ надорад, ки мо ба саломатии худ ва атрофиёнамон бепарвоӣ зоҳир намоем, балки чун пештара бояд ҳушёр бошем, ба қоидаҳои беҳдошти шахсиву ҷамъиятӣ эътибори ҷиддӣ диҳем ва ҳамдигарро эҳтиёт кунем.