ДУШАНБЕ, 8 фев — Sputnik. Интизор меравад, соҳибкорони Русия дар шаҳри Кӯлоб корхонаи муштараки сабзавотхушккунӣ таъсис диҳанд, хабар медиҳад котиботи раиси ин шаҳр.
Ба иттилои манбаъ, дар корхонаи сабзавотхушккунанда коркарди пиёз, карам ва ғайра ба роҳ монда мешавад.
Гуфта мешавад, соҳибкорони Русия ҷиҳати дарёфти бинои мувофиқ барои насби хатҳои технологӣ аз ҶСК "Сомонкӯлобтаҷҳизот" ва "Сано" дидан намуданд.
Бояд зикр намуд, ки соли 2019 дар шаҳри Кӯлоб 41 корхонаи саноатӣ фаъолият менамуд.
Барои ҷалби сармояи хориҷӣ ҷиҳати бунёди корхонаҳои саноатӣ дар шаҳр бо қарори Ҳукумати Тоҷикистон дар майдони 309,3 гектар Минтақаи озоди иқтисодӣ таъсис дода шуд.
Дар назар аст, ки дар ин Минтақаи озоди иқтисодӣ зиёда аз 3750 ҷойи нави кор ва 3 ҳазор ҷойи кори мавсимӣ таъсис дода шаванд.