ДУШАНБЕ, 11 январ - Sputnik. Кормандони милитсия ҷавони 20 - соларо боздошт намуданд, ки барои қасдан расонидани зарари вазнин ба саломатӣ муттаҳам дониста мешавад.
Ба иттилои котиботи Вазорати умури дохилаи Тоҷикистон, ҷавон ҳамдеҳаи худро ба хотири он корд зад, ки ӯ қаблан ба модари 45 - солааш пешниҳоди муносибати ошиқона карда буд.
Манбаъ меафзояд, ҷавон барои ҳифзи номуси модараш, шаби 10 январ, тақрибан соати 00:30 дақиқа дар ҳудуди деҳаи Гулистон бо марди 33 - сола вохӯрда, бо корд ду маротиба ба шиками охирон задааст.
Зимнан, хостгори муҳаббати зани 45 - сола, аз ҷароҳати расондаи фарзанди ӯ дар беморхона бистарӣ шуд.
Додгоҳи олӣ ҳукми марде, ки бо 13 зарби корд ҳамсарашро кушт, эълон кард
ВУД Тоҷикистон мегӯяд, нисбати ҷавони 20 - сола парвандаи ҷиноятӣ бо моддаи 110 қисми 1 Кодекси ҷиноятии Тоҷикистон оғоз гардида, тафтишот идома дорад.