ДУШАНБЕ, 25 июл — Sputnik. Бино ба иттилои дафтари матбуотии Федератсияи футболи Тоҷикистон, Кумитаи назорат ва одоби Федератсияи футболи Тоҷикистон қаблан тими “Саройкамар”-ро барои вайрон кардани қоидаи бозӣ дар вохурии пешакии Ҷоми футболи Тоҷикистон ҷазо додааст.
Тибқи иттилои манбаъ, масъулони тими “Саройкамар” дар рақобат бо “Панҷшер” ба ҷойи се бозигар чор нафарро иваз кардаанд.
Шуъбаи доварони ФФТ инчунин барои ҳайати расмии бозӣ низ муҷозоти интизомӣ татбиқ карданд. Довари асосии вохӯрӣ Сайвалӣ Турдиев, ёварони Ҳамза Шоймардонов ва Маҳмадраҷаб Каримов ва инчунин ҳаками эҳтиётӣ Наврӯз Воҳидов аз иштирок дар ду даври вохуриҳои Лигаи футболи Тоҷикистон маҳрум карда шуданд.
Ғайр аз он, нозири бозии "Саройкамар" - "Панҷшер" Абдулло Олимов барои ширкат дар чаҳор даври ин мусобиқот маҳрум шуд.
Бозии мазкур 7 июл доир гашта бо ҳисоби 2:1 ба фоидаи “Саройкамар” хотима ёфта буд.
Тибқи қарори ниҳоии Кумитаи одоби ФФТ тими “Саройкамар” ба таври техникӣ мағлуб ҳисобида шуда, натиҷаи бозӣ бо ҳисоби 0:3 ба фоидаи “Панҷшер” ҳал шуд.
Ҷарима ва маҳрумсозиҳо аз бозӣ: натиҷаи нишасти Кумитаи интизомии ФФТ
Илова бар ин, Кумитаи интизомии ФФТ аз шӯъбаи доварони Федератсия дархост кард, ки нисбати намояндагони расмии бозӣ - дастаи ҳакамон ва нозирони ин вохӯрӣ барои хунукназарӣ нисбат ба кор ҷазои сахтро татбиқ кунанд.