ДУШАНБЕ, 3 июн - Sputnik. Бино бар иттилои дафтари матбуоти мақомоти вилояти Хатлон, Қурбон Ҳакимзода, раиси вилояти Хатлон дар ҷаласаи ситоди вилояти қайд кардааст, ки тибқи таҳлилҳои кормандони соҳаи тандурустӣ, дар ҳудуди вилояти Хатлон шиддати бемории сирояти ба коронавирус нисбати дигар шаҳру ноҳияҳои кишвар паст гардида, вазъи бистари шудани сокинондар беморхонаҳои шаҳру ноҳияҳо камтар ба қайд гирифта шудааст.
Вай афзуд, ки то ин вақт наздик ба чор ҳазор нафар бо бемории илтиҳоби шуш ва бемориҳои сироятӣ табобат гирифта, феълан ҳудудан 180 нафари дигар таҳти назорати табибони дармонгоҳҳои вилоят қарор доранд.
Ҳамзамон раиси вилоят таъкид дошт, ки ба суратҳисоби махсус, ки барои маблағгузории барномаҳои пешгирӣ ва мубориза бо пандемияи COVID-19 дар вилоят кушода шудааст, то ин муддат 1,1 миллион сомонӣ ворид гардидаааст.
“Дар маҷмӯъ зиёда аз 11 миллион сомонӣ барои татбиқи тадбирҳои зиддиэпидемикӣ дар шаҳру навоҳии вилояти Хатлон ихтисос дода шудааст”, - гуфт раиси вилоят Қурбон Ҳакимзода.
Инчунин вай афзудааст, ки барои хизматрасонии босифат ва баландихтисоси тиббию санитарӣ ба беморон, хусусан ба беморони мубталои бемориҳои сироятӣ, тибқи дастуру супоришҳои ситоди вилоятӣ мунтазам рейдҳои муштарак гузаронида шуда, ҳолати омодабошии муассисаҳои тандурустӣ мунтазам мавриди таҳлилу омӯзиш қарор дода мешавад.