ДУШАНБЕ, 12 май – Sputnik. Ҷамолиддин Абдуллозода, вазири тандурустӣ ҳифзи иҷтимоии аҳолии Тоҷикистон бо Ҳанс Ҳенри Клюге, директори минтақавии Созмони ҷаҳонии беҳдошт дар Аврупо суҳбати телефонӣ анҷом дод, иттилоъ додааст дафтари матбуоти вазортаи тандурустии кишвар.
Бино бар иттилои манбаъ, зимни мулоқот ҷонибҳо масъалаҳои пешгирӣ ва табобати гирифторони сирояти коронавируси нави COVID-19-ро дар мамлакат мавриди баррасӣ қарор доданд.
Ҷамолиддин Абдуллозода иброз намудааст, ки айни ҳол ҳукумати Тоҷикистон барои пешгирӣ ва табобати гирифторони ин беморӣ тамоми чораҳои заруриро амалӣ намуда истодааст.
Дар ҳамин ҳол, Ҳанс Ҳенри Клюге, директори минтақавии Созмони ҷаҳонии беҳдошт дар Аврупо иброз дошт, ки ин ташкилот омодааст мутахассисони зудамалро ба Тоҷикистон сафарбар намояд.
“Ҳамзамон, номбурда пешниҳод намуд, ки бояд ташхисгоҳҳои сайёри мобилӣ ҷиҳати гузаронидани аҳолӣ аз ташхисҳои тестӣ ба роҳ монда шавад”,- таъкид кардааст вазорати тандурустӣ.
Ҳамзамон ҷонибҳо дар бораи дигар масъалаҳои соҳаи тандурустӣ мубодилаи афкор намуданд.
Ҳамчунин зимни суҳбат тарафҳо барои густариши ҳамкориҳои мутақобилан судманд ҳавасмандии хешро иброз доштанд.