ДУШАНБЕ, 29 фев — Sputnik. Дафтари матбуоти ҷамоати деҳоти Ёваи ноҳияи Бобоҷон Ғафуров, ки чароғи хомӯш дар қаламрави он ҷойгир буд, бо нашри аксҳо хабар дод, ки 28 феврал чароғаки роҳнамо таъмир ва фаъол шуд.
Чароғаки мазкур, ки қариб 5 соли охир кор намекард, ахиран аз мавзӯъҳои баҳс дар шабакаҳои иҷтимоӣ, нишасти матбуотии раиси ноҳияи Бобоҷон Ғафуров ва гузориши расонаҳо шуда буд.
Шарифҷон Қобилов, сокини ҷамоати Ёваи ноҳияи Бобоҷон Ғафуров ва аз шумори ронандаҳо изҳор дошт, ки дар сероҳае, ки чароғаки роҳнамои хомӯш ҷойгир аст, садамаҳо зиёд рух медоданд.
“Мутаассифона қариб рӯзе нест, ки дар ин роҳ, ҳодисаҳои нохуши нақлиётӣ рух надиҳанд. Дирӯз як садама рух дод, рӯзи гузашта ҳам садамаро дида будем, аммо ҳеч касе аз масъулин ба ин чароғаки хомӯш аҳамият намедиҳад", - изҳор дошта буд Қобилов дар суҳбат бо расонаҳо.
Рӯзноманигорон дар нишасти ахири матбуотӣ масъалаи чароғаки мазкурро бо Зариф Назирӣ, раиси ноҳияи Бобоҷон Ғафуров дар миён гузоштанд ва Назирӣ гуфт, барои таъмири ин чароғак 7 ҳазор сомонӣ аз ҳисоби буҷа ноҳия ҷудо кардааст. Котиботи ҷамоати Ёва хабар дод, ки тибқи ваъда чароғакро 28 феврал фаъол карданд.