ДУШАНБЕ, 5 фев — Sputnik. Ин барномаи омӯзишӣ дар ҳамкорӣ бо Донишкадаи давлатии идоракунии назди раисиҷумҳури Тоҷикистон баргузор шуд, хабар додаст котиботи Донишгоҳи Осиёи Марказӣ.
Ба иттилои манба, барномаи омӯзишии сиёсати иқтисодӣ бо ҳадафи ироа кардани маҳоратҳои нав, ки барои таҳлил дар асоси иттилооти дақиқ зарурунд, баргузор мешавад.
Таҳмина Толибӣ, намояндаи Вазорати молияи Тоҷикистон мегӯяд, ин барнома хеле ҷолиб ва муфид буд.
“Таваҷҷуҳи асосӣ ба далел ва мантиқ, ки дар меҳвари сиёсати ниҳодҳои давлатӣ амалӣ ва барномарезӣ мешаванд, равона шудааст. Ман донишҳои андӯхтаамро бо ҳамкорони худ дар миён гузоштам ва дар байни мо баҳси ҷолибе рух дод”, - изҳор дошт Толибӣ.
Ин барномаи семоҳа аз 6 қисмат иборат аст ва самтҳои калидии сиёсат иқтисодӣ ба монанди умури молии давлатӣ, бозори меҳнат ва маориф, тиҷорати байналмилалӣ, хоҷагии қишлоқ, саноати истихроҷ ва рушди устуворро дар бар мегирад.
Дар доираи ин барнома донишомӯзон бояд дар мавриди ягон мавзӯъи мубрам, ба монанди амнияти ғизо ва ё коҳиш додани қарзи давлатӣ санади барномавиеро омода кунанд.
Дар даври омӯзишии гузашта, намояндагони Вазорати молия, Вазорати кишоварзӣ, Вазорати саноат ва тенологияҳои нав, Хадамоти гумрук ва Донишкадаи давлатии идоракунии назди раисиҷумҳури Тоҷикистон иштирок кардаанд.
Барномаи таълимии сиёсати иқтисодӣ ҷузъе аз барномаи густурдаи таҳқиқотӣ – “Роҳ ба фановариҳо” мебошад, ки аз ҷониби Пажуҳишгоҳи рушди байналмилалии Канада сармоягузорӣ мешавад. Моҳи марти соли равон ин барномаи таълимӣ гуруҳи нави шунавандаҳоро фаро хоҳад гирифт.