ДУШАНБЕ, 6 дек - Sputnik. Вазири корҳои дохилӣ генерал-полковники милитсия Рамазон Раҳимзода бо сафири Фавқулодаи Чин дар Тоҷикистон Лю Бин ва муовини раиси Агентии давлатии рушди ҳамкориҳои байналмилалии кишвари мазкур ҷаноби Дэн Ботсин дидору мулоқот кардааст.
Дар ин бора Вазорати умури дохилаи Тоҷикистон хабар медиҳад.
Гуфта мешавад, ки ҷонибҳо масъалаҳои тақвият бахшидани ҳамкориҳоро дар самти мубориза бар зидди терроризм, экстремизм, сепаратизм, гардиши ғайриқонунии маводи мухаддир, силоҳ ва хариду фурӯши одамон мавриди баррасӣ қарор додаанд.
Дар ҷараёни вохӯрӣ ҷонибҳо мубодилаи иттилооти оперативӣ ва дигар мавзӯъҳои мавриди таваҷҷӯҳро баррасӣ намудаанд.
Ҳамчунин, доир ба таҳдиду хатарҳои замони муосир, аз қабили ҷинояткориҳои муташаккили фаромиллӣ ва пешгирию муборизаи дастаҷамъона дар ин самт як қатор таклифу пешниҳодҳои судманд ироа кардаанд.
Дар рафти вохӯрӣ ҷонибҳо омодагии худро ҷиҳати боз ҳам рушду густариш додани ҳамкориҳо изҳор доштаанд.