ДУШАНБЕ, 30 авг — Sputnik. Ҳудуди 700 кило намудҳои гуногуни воситаи нашъадор, ки ҳалнома ва таъиноти судиашон ба тасвиб расидааст бо иштироки намояндагони ВАО, мақомоти додситонию додгоҳ ва дигар сохторҳои марбута сӯзонида шуд, гузориш дод ВУД.
Манбаъ афзуд, маводи нашъадори сӯзондашуда дар доираи 256 парвандаи ҷиноӣ мусодира шуда буд.
“Аз ҷумла, 25 кг 265 гр героин, 422 кг 688 гр ҳашиш, 143 кг 892 гр афюн, 37 кг 214 гр бангдона, 5400 ниҳоли кукнор, 94 ниҳоли бангдона, 9 ампула фенобарбитал, дар асоси иҷроварақаҳои судӣ барои несту нобуд кардан омода ва дар оташдон дар ҳарорати зиёда аз 1000 дараҷа гармӣ сӯзонида шудаанд”, - омадааст дар иттилоия.
ВУД таъкид кард, ки мухаддароти сӯзонидашуда натиҷаи фаъолияти милитсияи Суғд аст, ки дар доираи чорабиниҳои оперативӣ - ҷустуҷӯӣ аз муомилоти ғайриқонунӣ мусодира гардид.
Ин ниҳод илова намудааст, ки мусодираи маводи мухаддир дар мақомоти корҳои дохилӣ яке аз самтҳои фаъолиятест, ки барои ҳифзи саломатии аҳолӣ нигаронида шуда, ҳангоми натиҷагирӣ ва баҳодиҳии фаъолияти шуъбаву хадамоти мақомот ба ин самт таваҷҷуҳи махсус дода мешавад.