ДУШАНБЕ, 5 авг — Sputnik. Сарбозони Чин бо худравҳои зиреҳпӯш ва силоҳу аслиҳаи худ барои иштирок дар машқҳои низомии муштарак вориди хоки Тоҷикистон мешаванд, иттилоъ додааст хабаргузории ТоҷикТА.
Тавре Ориф Нозимиён, сухангӯи Вазорати дифои Тоҷикистон иттилоъ додааст, тамринҳои низомии артиши Тоҷикистону Чин аз 8 августи соли равон шурӯъ шуда то 11 август дар минтақаи Ишкошими ВМКБ идома хоҳад ёфт.
Дар тамринҳои муштараки мазкур як гурдони сарбозони Вазорати дифои Тоҷикистон ва як вашти артиши Чин иштирок хоҳад кард.
Дар машқҳои мазкур низомиёни ду кишвар амалҳои муқовимати муштарак ҳангоми ворид шудани террористон аз хоки Афғонистон тариқи Тоҷикистон ба Чинро тамрин хоҳанд кард.
Дар тамринҳои мазкур неруҳои ҳавоӣ, тонку туп ва дигар намуди аслиҳа истифода хоҳад шуд.
Ёдрас мешавем, ки тамринҳои низомии зиддитеррористии муштарак миёни низомиёни Тоҷикистону Чин дар моҳи июни соли 2015 анҷом ёфта буд.
Инчунин, моҳи октябри соли 2016 низомиёни ду кишвар дар ВМКБ амалиёти махсус барои омодагии низомӣ анҷом дода буданд.