ДУШАНБЕ, 24 июн — Sputnik. Тибқи иттилои Кумитаи миллии олимпии Тоҷикистон, бозии ҷавобии рафиқона миёни тимҳои мунтахаби наврасони Тоҷикистон ва Узбакистон – “U-16” бо ҳисоби 1:2 ба фоидаи меҳмонон анҷом ёфт.
“Бозӣ дар Варзишгоҳи “20-солагии истиқлолияти Тоҷикистон”-и шаҳри Хуҷанд доир гашт. Ҳисобро дар дақиқаи 21-ум футболбози навраси тоҷик Хуршед Давлатзода кушод. Аммо 7 дақиқа то танаффус меҳмонон тавассути голи задаи Шаҳзод Акрамов ҳисобро баробар карданд”, - иттилоъ дод Кумитаи миллии олимпӣ.
Манбаъ афзуд, голи ғолибиятро дар дақиқаи 63-юм Муҳриддин Позлиддинов аз зарбаи ҷаримавӣ зад.
Бохт дар бозии рафиқона дар ҳолест, ки ду рӯзи қабл, дар бозии аввали рафиқона дастаи мунтахаби наврасони Тоҷикистон бар ҳамсолонашон аз Узбакистон бо ҳисоби 4:0 ғалаба карда буд.
Бозиҳои рафиқонаи баргузоршуда барои тими мунтахаби наврасони Тоҷикистон як марҳилаи омодагӣ ба марҳилаи интихобии Чемпионати Осиё-2020 маҳсуб меёфт, ки 14-22 сентябр дар Урдун баргузор мешавад. Дар давраи интихобии Чемпионати Осиё-2020 шогирдони Аҳлиддин Турдиев дар гурӯҳи “А” бо тимҳои наврасони Урдун, Шри-Ланка, Кувайт ва Непал бозӣ мекунанд.