ДУШАНБЕ, 5 июн — Sputnik. Бино бар иттилои дафтари матбуоти мақомоти шаҳри Хуҷанд, истгоҳи нақлиёти ҷамъиятӣ аз ҷониби соҳибкори ватанӣ Заррина Болтуева сохта шудааст.
Истгоҳи мазкур ба меъёрҳои байналмилалӣ мутобиқат дошта, бо назардошти сабку услуби меъмории миллӣ сохта шудаааст.
Тибқи лоиҳа истгоҳ аз ҷойи нишаст, мағозаи фурӯши маҳсулотҳои ширкати “Добрый фермер” ва ғайраҳо иборат мебошад. Дар истгоҳ инфрасохтор аз қабили ҷой барои таблиғ, пайвасташвиӣ ба шабакаи Интернет тариқи Вай-фай имконпазир гардидааст.
Тибқи иттилои манбаъ, ҳудуд ва атрофи истгоҳ тавассути камераҳои мушоҳидавӣ назорат карда мешавад, ки ин ба таъмини хизматрасонии босифат мусоидат хоҳад кард.
“Дар маҳаллаи Себзори шаҳри Хуҷанд сохтмони 5 адади дигар чунин истгоҳҳо ба нақша гирифта шудаанд, ки он аз ҷониби соҳибкори ватанӣ Заррина Болтуева марҳила ба марҳила сохта ба истифода дода мешаванд”, - таъкид намудааст манбаъ.
Зимни ифтитоҳи истгоҳ раиси шаҳри Хуҷанд Маъруф Муҳаммадзода сокинони маҳалларо бо бунёди истгоҳи замонавӣ таҳният гуфта, қайд намудааст, ки ин иқдоми неки соҳибкори ватанӣ шоистаи таҳсин аст.
Дар ҳамин ҳол, шаҳрдор ба масъулини дахлдор супориш дод, ки ба ободонии атрофии истгоҳ ва чароғонкунии муосири он низ эътибори ҷиддӣ дода шавад.
Манбаъ зик намудааст, ки зимни ифтитоҳи истгоҳ ба 100 нафар ниёзмандони маҳаллаи Себзор маҳсулотҳои ширкати “Добрый фермер” тақдим карда шуд.