ДУШАНБЕ, 12 май — Sputnik. Раисиҷумҳури Тоҷикистон аз он, ки буҷаи давлат иҷро намешаваду қасрҳои масъулини гумруку андоз бунёд мешаванд, нигаронӣ кард.
“Буҷет мегӯем, иҷро нашуд. Ин қаср аз куҷо пайдо шуд?”, - cуол гузошт Эмомалӣ Раҳмон 10 май дар мулоқот бо кормандони мақомоти молия, андоз ва гумрук.
“Чихел корманди гумрук, ду сол кор накардааст, 10-15 хона, 6-7 мошини хориҷие, ки ҳамааш ҳаштод ҳазор долларӣ. Аз куҷо меёбад? Се-чор зан. Ин якум ҳодиса нест, ин анъана шуда рафта истодааст”, - таъкид дошт Эмомалӣ Раҳмон.
Ӯ афзуд, ки дар водиҳои Ромиту Варзоб ва дигар минтақаҳо қасрҳои сершумор қомат афрохтаанд ва вақте суол мекунад, ки аз кист посух медиҳанд, ки аз фалонча, корманди гумруку андоз мебошад.
Раисиҷумҳур таъкид намуд, ки дар мавриди дороии сӣ - чил фоизи кормандони ин ниҳодҳо маълумотро рӯи даст дорад.
“Як хелаш 10-15 хона дорад. Ин дараи Ромит меравӣ, аз киай? Аз фалонча – гумрук. Дар дараи Варзоб аз киай? Аз корманди андоз”, - изҳор дошт Раҳмон.
Раисиҷумҳур ҳушдор дод, ки дороиҳои мақомдоронро тариқи телевизион нишон медиҳад ва таъкид намуд, ки аз чаҳорчӯбаи қонун набароянд.