ДУШАНБЕ, 6 май — Sputnik. Тибқи иттилои ВУД, 5-уми майи соли 2019, тахминан соатҳои 12:00, ронандаи автомашинаи тамғаи “Опел-Вектра”, Хуршеди Даврон, сокини 25-солаи деҳаи Файзободи ноҳияи Рӯдакӣ пиёдагарди ноболиғро зер кардааст.
“Хуршеди Даврон, ронандаи “Опел-Вектра”, ҳангоми ҳаракат дар шоҳроҳи Ваҳдат-Душанбе, дар ҳудуди ноҳияи Рӯдакӣ аз ӯҳдаи идораи воситаи нақлиёт набаромада, ноболиғ Воҳидҷони Абдусамад, соли таваллудаш 2007, сокини деҳаи Тезгари Поёнро пахш намудааст”, - омадааст дар иттилоия.
Манбаъ афзуд, ки дар натиҷа Воҳидҷони Абдусамад дар беморхона ба ҳалокат расидааст.
Ба иттилои ВУД, садамаи дигари маргбор, ки бо ҳалокати пиёдагард анҷомид, 5-уми майи соли 2019, тахминан соати 02:20 дар ҳудуди шаҳри Истаравшан рух дод.
“Ронандаи автомашинаи тамғаи “Опел-Астра”, Қодиров Ғайбуллобек Нуруллоевич, соли таваллудаш 1986, сокини деҳаи Яккатол, ҳангоми ҳаракат дар шоҳроҳи “Душанбе-Хуҷанд-Чаноқ” дар ҳудуди шаҳри Истаравшан, аз ӯҳдаи идораи воситаи нақлиёт набаромада, пиёдагарди шахсияташ номаълум, ҷинсаш мард, тахминан 55-60-сола, миллаташ таҳҷоиро пахш намудааст”, - омадааст дар иттилоияи ВУД.
Ин ниҳод таъкид кард, ки пиёдагард дар беморхона ба ҳалокат расида, феълан чорабиниҳо барои муайян намудани шахсияти марҳум идома доранд.