ДУШАНБЕ, 30 апр — Sputnik. Бино бар иттилои дафтари матбуоти Вазорати умури дохилаи Тоҷикистон дар ноҳияи Шаҳритус зани 30-сола бо иттиҳоми дуздӣ дастгир шудааст.
Тибқи иттилои манбаъ, ахиран ба ШВУД дар ноҳияи Шаҳритус марди 37-солаи сокини деҳаи Сайёди ноҳияи мазкур муроҷиат намудааст, ки рӯзи 28-уми марти соли равон, тахминан соатҳои 11:30-дақиқа, шахси номаълум бо роҳи пинҳонӣ ба хонаи истиқоматиаш даромада, аз он ҷо 6000 сомонӣ ва ҷавоҳироти гуногуни тиллоию нуқрагӣ, ҷамъ ба маблағи 10 ҳазору 800 сомониро дуздида, аз ҷойи ҳодиса ғайб задааст.
Кормандони милитсия ҳангоми гузаронидани чорабиниҳои оперативӣ-ҷустуҷӯӣ зани 30-солаи сокини деҳаи Сайёд бо гумони дуздӣ дастгир карданд.
Дар ҳоли ҳозир кормандони милитсияи Тоҷикистон нисбати ҳодисаи мазкур тафтишотро идома доранд.