ДУШАНБЕ, 25 мар - Sputnik. Дар ин бора Федератсияи футболи Тоҷикистон хабар дода, афзуд, ки голро футболбозон Далер Ёдгоров ва Шарафҷон Солеҳов мутаносибан дар дақиқаҳои 30 ва 85-уми бозӣ ба ҳадаф расонданд.
ФФТ афзуд, бозии ниҳоии марҳилаи интихобиро тими Тоҷикистон бо дастаи Узбакистон мегузаронад, ки 26 март дар варзишгоҳи “Пахтакор”-и Тошканд баргузор мешавад. Оғози бозӣ 17:00 дар назар аст.
Усмон Тошев, сурмураббии мунтахаби олимпии Тоҷикистон дар пайи сабқат аз бозии шогирдонаш изҳори қаноатмандӣ карда, афзуд, баъзе камбудиҳо ҷой доштанд, ки барои ислоҳи он кор хоҳанд кард.
Дар асоси натиҷаи марҳилаи интихобӣ ғолибони 11 гурӯҳ, ҳамчунин 4 дастаи беҳтарини гурӯҳҳо, ки ҷои дуюмро ишғол кардаанд, ба марҳилаи финалии чемпионати Осиё, ки 8-26 январи соли 2020 дар Тайланд доир мегардад, роҳхат мегиранд. Агар мизбони чемпионат – дастаи мунтахаби Тайланд дар гурӯҳ ҷои аввалро ишғол кунад, ё миёни 4 дастаи беҳтарини ҷои дуюми гурӯҳҳо бошад, пас дастаи панҷуми ҷои дуюми гурӯҳҳо, ки нишондиҳандаи хуб дорад, соҳиби роҳхат ба марҳилаи финалӣ мегардад.
Се дастаи беҳтарини чемпионати Осиё-2020 ҳаққи иштирок дар Бозиҳои олимпии Токио-2020-ро пайдо мекунанд.