ДУШАНБЕ, 20 мар — Sputnik. Субҳи рӯзи 20 март Президенти Тоҷикистон Эмомалӣ Раҳмон бо мақсади иштирок дар тантанаҳои идона бахшида ба Соли нави миллӣ-ҷашни байналмилалии Наврӯз, ба шаҳри Нораки вилояти Хатлон сафар кард, иттилоъ додааст дафтари матбуоти раисҷумҳур.
Бино бар иттилои манбаъ, зимни сафари кориаш раисҷумҳури кишвар бо ҷараёни корҳои бунёдкорию созандагӣ ошно шуда, дар ифтитоҳи як зумра иншооти таъйиноти гуногун ба шаҳри Нораки вилояти Хатлон ширкат хоҳад кард.
Инчунин, манбаъ таъкид намудааст, ки Эмомалӣ Раҳмон, раисҷумҳури кишварро роҳбарияти вилояти Хатлон, аҳли илму фарҳанг ва ҷавонони шаҳри Норак бо рӯҳияи болида ва фазои шукӯҳманди наврӯзӣ истиқбол гирифтанд.
Ёдрас мешавем, ки субҳи имрӯз Эмомалӣ Раҳмон дар рӯзҳои таҷлили Наврӯзи байналмилалӣ дар шаҳри Норак ба татбиқи лоиҳаи “Барқарорсозии Неругоҳи барқи обии “Норак” оғози расмӣ бахшид.
Бино бар иттилои манбаъ, нахуст Эмомалӣ Раҳмон ба лоиҳаи тарҳи корҳои таъмири асосии неругоҳ ошно шуд.
Манбаъ таъкид намудааст, ки зимни шиносоӣ бо тарҳи лоиҳаи таъмири асосии Неругоҳи барқи обии “Норак” Президенти кишвар ба роҳбарияти Вазорати энергетика ва захираҳои оби ҷумҳурӣ барои назорати иҷрои босифати корҳо супоришҳои мушаххас дода, ба ширкати пудратии лоиҳа - ширкати австриягии “Andritz Hydro”, мушовири лоиҳа - ширкати шветсариягии “Stucky Ltd” ва зерпудратчии лоиҳа - ширкати ватании “Тоҷик СГЭМ” ҷиҳати татбиқи саривақтии лоиҳа маслиҳатҳои муфид пешниҳод намуданд.