ДУШАНБЕ, 4 мар — Sputnik. Чанд дақиқа пеш ҳаракати воситаҳои нақлиёт, ба истиснои автомобилҳои ядакдор ва "Фура"-ҳо аз самти Хуҷанд ба Душанбе шурӯъ шуд, омадааст дар иттилоияи ширкати IRS.
Ёдовар мешавем, ки аз субҳи имрӯз то ин вақт ҳаракати автомобилҳо аз Душанбе ба ҷониби Хуҷанд роиҷ буд.
Тавре қаблан иттилоъ дода будем, шурӯъ аз 1 марти соли равон бинобар зиёд будани тармафароӣ ҳаракати ҳама намуди воситаҳои нақлиёт дар роҳи Душанбе-Чаноқ боздошта шуда буд. Давоми ин рӯзҳо аз ҷониби кормандони филиали Ширкати саҳомии “Инновейтив Роуд Солюшнз ЛТД” зиёда аз 85 тармаи хурду бузург бартараф гардиданд.
Нимаи дуюми дирӯз дар ин роҳ ҳаракати воситаҳои нақлиёт, ба истиснои мошинҳои ядакдор ва “Фура”-ҳо бо фосила аз як самт имконпазир гардид. Барои мисол, дирӯз ҳаракати нақлиёт аз Хуҷанд ба самти Душанбе таъмин шуда, субҳи имрӯз аз Душанбе ҷониби Хуҷанд роҳандозӣ гардид.
Бино ба иттилои манбаъ, дар мавсими сармои имсола тадбирандешиҳо хеле зиёд буда, тибқи муқаррароти Фармоиши якҷояи вазоратҳои корҳои дохилӣ ва нақлиёти мамлакат ситоди муштарак аз ҳисоби кормандони ширкат ва вазорати нақлиёт ва корҳои дохилӣ таъсис ёфтааст. Аъзои он тасмим мегиранд, ки дар сурати афзоиш ёфтани хатари тарма ё дигар омилҳо ҳаракати нақлиёт қатъ карда шавад.