ДУШАНБЕ, 22 янв — Sputnik. Тибқи қарори Рустами Эмомалӣ дар даъвати баҳории соли 2019 шаҳрвандони солҳои таваллудашон 1992 - 2001 ба хизмати ҳарбӣ даъват мешаванд.
Шаҳрдор раисони навоҳии Душанбе, раёсати тандурустӣ ва Комиссариати ҳарбии пойтахтро муваззаф кардааст, ки омӯзиши шаҳрвандони синну соли даъватиро ба роҳ монда, шумораи дақиқи даъватшавандагонро муайян намоянд.
“То санаи 25 марти соли 2019 барои гузаштани муоинаи пешакии тиббӣ тадбирҳои зарурӣ андешида, даъватшавандагоне, ки гирифтори бемориҳои табобатшавандаанд, дар якҷоягӣ бо марказҳои табобатию солимгардонӣ чораҳои зарурӣ андешанд”, - омадааст дар қарори шаҳрдорӣ.
Комиссарони ҳарбӣ ва раисони маҳаллаҳо вазифадор карда шудаанд, ки рӯйхати пурраи ҷавонписарони синну соли даъватиро дар муҳлати кӯтоҳтарин барои омӯзиш пешниҳод намоянд.
“Муассисаҳои таҳсилоти олӣ ва миёни касбӣ, корхонаҳо, марказҳои савдо ва хизматрасониҳо новобаста аз шакли фаъолияташон баҳри муташаккилона сафарбар намудани ҷавононписарони синну соли даъватӣ тадбирҳои зарурӣ андешанд”, - таъкид кардааст шаҳрдор дар қарораш.
Рустами Эмомалӣ назорати иҷрои қарори мазкурро ба зиммаи муовини раиси шаҳри Душанбе Назирмадзода Бахтиёр вогузор кардааст.