ДУШАНБЕ, 7 окт — Sputnik. Бино бар иттилои вазорати фарҳанги Тоҷикистон, аз 18 то 20 октябри соли равон дар бинои Муассисаи давлатии “Китобхонаи давлатии бачагонаи ҷумҳуриявии ба номи Мирсаид Миршакар”, ки дар хиёбони Рӯдакӣ 36 шаҳр ҷойгир аст, намоишгоҳи ҳаштуми байналмилалии “Китоби Душанбе” баргузор мегардад.
Ба гуфтаи манбаъ, дар Намоишгоҳи мазкур, ки аз ҷониби Вазорати фарҳанги Тоҷикистон ташкил мешавад, ширкатҳои табъу нашри ватаниву хориҷӣ маводи чопию таҷҳизоти полиграфии хешро пешниҳод менамоянд.
Вазорати фарҳанг таъкид намудааст, ки воридшавӣ ба Намоишгоҳ комилан озод ва ройгон аст.