ДУШАНБЕ, 2 окт — Sputnik. Ҳунарпеша ва ровии номии тоҷик Таҳмина Раҷабова барои нақшофарӣ дар филми муштараки Тоҷикистону Узбакистон "Борон" даъват шудааст.
Тавре аз "Тоҷикфилм" хабар доданд, коргардони филм Рустам Саъдиев Таҳмина Раҷабова ва чор ҳунарманди дигар, аз ҷумла ҳунарманди машҳур Қурбони Собирро ба ҳамкорӣ даъват кардааст.
"Борон" нахустин филми муштараки Тоҷикистону Узбакистон дар солҳои истиқлолият хоҳад шуд.
Ёдрас мешавем, аввалҳои моҳи сентябр дар Тоҷикистон Рӯзҳои кинои Узбакистон доир карда шуд, ки дар ҷараёни онҳо миёни Киностудияи давлатии "Тоҷикфилм" ва агентии "Ӯзбеккино" тафоҳумномаи ҳамкорӣ ба имзо расид.
Тибқи ин санад, минбаъд киностудияҳои ду кишвари ҳамсоя ва дӯст ҳунармандони худро барои иҷрои нақшҳо ба филмҳояшон даъват намуда, аз имкониятҳо ва таҷҳизоти ҳамдигар бемамониат истифода ва ба паҳн намудани филмҳояшон дар кишварҳои ҳамдигар мусоидат менамоянд.