ДУШАНБЕ, 17 июл — Sputnik. Як зани сайёҳи тоҷик дар мошини ёрии таъҷилӣ дар шаҳри Тифлис, пойтахти Гурҷистон духтарча таваллуд кардааст.
Тибқи иттилоия, ки дар Facebook нашр шудааст, зану шавҳар аз Тоҷикистон ба Гурҷистон барои истироҳат ва сайёҳӣ омадаанд.
Зани 28-солаи тоҷик ҳангоми шиддат гирифтани дарди зоишаш ба ёрии таъҷилӣ занг задааст, аммо то беморхона нарасидаанд.
Модар духтарчаашро Белла, ба номи табиби гурҷие мондааст, ки ҳангоми таваллуд дар мошини ёрии таъҷилӣ ба ӯ кӯмак намудааст. Табибон вазъи саломатии духтарчаро хуб арзёбӣ мекунанд.