ДУШАНБЕ, 22 фев — Sputnik. Куштигири самбои тоҷик Набимуҳаммад Хоркашев маблағашро барои иштирок дар Ҷоми ҷаҳон-2017 гирифта натавонист.
Чуноне маълум шудааст, маблағро ба Набимуҳаммад ба далели ширкат накардан дар омодагиҳои дастаӣ пардохт накардаанд. Дар ин бора дар нишасти матбуотӣ раиси Кумитаи ҷавонон ва варзиши Тоҷикистон Аҳтам Абдуллозода хабар додааст.
"Чӣ тавре, ки мо медонем, дар арафаи чорабиниҳои муҳими ҷаҳонӣ, варзишгарон — аъзои дастаи мунтахаби миллӣ — омодагии пешазсабқатиро бояд гузаранд. Дар остонаи мусобиқаи ҷаҳонии Самбо дар охири моҳи октябри соли 2017 ҳамин тавр ҳам буд. Аммо, бо вуҷуди даъватҳои чандинмаротибаи такрорӣ, Набимуҳаммад Хоркашев, ки ба дастаи мунтахаби миллӣ шомил буд, ба омодагиҳо ҳозир нашуд", — шарҳ дод Аҳтам Абдуллозода.
Тибқи иттилои ӯ, сармураббии даста, насаби Хоркашевро ба буҷаи дахлу харҷ ворид накардааст, ҳарчанд аз рӯйихати дастаи миллӣ, ки ба қаҳрамонӣ фиристода шуда буд, ихроҷ нашудааст.
"Варзишкоре, ки дар омодагиҳои дастаӣ бо далели беэҳтиромӣ иштирок намекунад, қариб дар ҳама мавридҳо ба қаҳрамонӣ роҳ дода намешавад. Ҳол он ки бори охир бо Набимуҳаммад Хоркашев чунин ҳодиса рух дода буд, ҳангоме, ки ӯ дар рӯйхати даста буду ба қаҳрамонии қитъавӣ нарафта буд", — гуфт Аҳтам Абдуллозода.
Қаҳрамонии 42-юми ҷаҳонӣ оид ба самбо рӯзҳои 10-12-уми ноябри соли 2017 дар шаҳри Сочи баргузор гардид. Дар ин сабқат 9 варзишгари тоҷик иштирок карданд. Он замон сафари Набимуҳаммад Хоркашев аз ҳисоби идораи варзиши ҷумҳурӣ пардохт шуда буд.
Масъала пас аз он роҳи ҳалли худро ёфт, ки сарпарастон ҳазинаи сафари ӯро пардохт намуда буданд. Дар он қаҳрамонии ҷаҳон Набимуҳаммад дар вазни беш аз 100 кг ғолиб омада, медали биринҷӣ ба даст оварда буд. Натиҷаи беҳтаринро аз дастаи мунтахаби миллии Тоҷикистон Беҳрӯз Ҳоҷизода (дар вазни 74 кг) нишон дода, соҳиби медали тилло гашта буд.