ДУШАНБЕ, 16 янв — Sputnik. Сухангуи Вазорати умури дохилии Русия аз боздошти панҷ шаҳрванди Русия, Тоҷикистон ва Белорус ба иттиҳоми қочоқи маводи мухаддир хабар дод.
“Панҷ шаҳрванди Русия, Белорус ва Тоҷикистон боздошт шудаанд. Беш аз 6 килуграм ҳероин, ки беш аз 11 милюн рубл арзиш дорад, аз гардиши ғайриқонунӣ хориҷ карда шуд”, — гуфт Ирина Волк.
Вай гуфт, барои арзёбии ҷурм ва таъйини кайфари ин муттаҳамон ба қочоқи маводи мухаддир парванда ташкил шудааст.
Ин афрод, ки дар амалиёти ҷудогонаи нерӯҳои вижаи пулиси Русия дар вилоятҳои Маскав ва Челябинск дастгир шудаанд, ҳамакнун дар боздоштгоҳ ба сар мебаранд.
Ёдоварӣ мекунем, ки Додгоҳи вилояти Маскав дар поёни соли 2017 Шералӣ Табаров, саркардаи тоҷики як гурӯҳи қочоқчии маводи мухаддирро ба иттиҳоми интиқоли 600 килуграм ҳероин ба Русия дар солҳои 2012 – 2016 ба ҳабси абад маҳкум кард.
Ҳамчунин 14 узви ин гурӯҳ, ки шаҳрвандони Тоҷикистон буданд, аз 6 то 25 сол маҳкум ба зиндон шуданд.
Дар зиндонҳои Русия беш аз 8 ҳазор шаҳрванди Тоҷикистон давраи маҳкумияти худро мегузаронанд, ки яксевумашон ба иттиҳоми даст доштан дар интиқолу фурӯши маводи мухаддир маҳкум шудаанд.