ДУШАНБЕ, 11 янв — Sputnik. Дар шаҳри Душанбе ҷаласаҳои Кумисиюни ҳамкориҳои иқтисодиву тиҷории Ҷумҳурии Тоҷикистон ва Ҷумҳурии Узбакистон ва Кумисиюни муштараки марзбандӣ ва аломатгузории Марзи давлатии Тоҷикистону Узбакистон баргузор шуданд.
Ба иттилоъи Вазорати умури хориҷаи ҶТ, дар ин ин ҷаласаҳо, ки бо раёсати нахуствазири Тоҷикистон Қоҳир Расулзода ва сарвазири Узбакистон Абдулло Орипов баргузор шуданд, ҷонибҳо бар аҳамияти рушди равобити ду кишвар дар фазои дӯстӣ ва ҳусни ҳамҷаворӣ таъкид карданд.
"Дар ҳошияи ҷаласаҳо доираи васеи масоили муҳими ҳамкориҳои дуҷониба, аз ҷумла самтҳои асосии робитаҳои мутақобилаи Тоҷикистону Узбакистон дар заминаҳои иқтисоду тиҷорат, нақлиёт, саноат ва фарҳангу маориф баррасӣ шуданд", — гуфта мешавад дар иттилоъи манбаъ.
Ба масъалаҳои омодагӣ ба сафари давлатии раисҷумҳури Узбакистон Шавкат Мирзиёев ба Ҷумҳурии Тоҷикистон, таваҷҷуҳи махсус зоҳир карда шуд, афзудааст ВУХ.
Мавзуъи амалкарди минбаъда ҷиҳати марзбандӣ ва аломатгузории марзи давлатӣ ва ҳалли масоили марбут ба омадурафт ва будубоши шаҳрвандони ду кишвар дар қаламрави якдигар ҷудогона матраҳ гардид.
Ҷонибҳо дурнамои тавсеаи минбаъдаи ҳамкориҳои самараноки тиҷоратию иқтисодӣ, татбиқи тарҳҳои муштараки минтақавӣ, пешбурди муколамаи фарҳангӣ ва байни миллатҳоро муайян намуданд.
Изҳори умедворӣ гардид, ки натиҷаҳои музокироти доиршуда омили муҳим дар таъмиқи ҳамкориҳои фарогири дуҷониба миёни Ҷумҳурии Тоҷикистон ва Ҷумҳурии Узбакистон мегарданд.