ДУШАНБЕ, 8 май – Sputnik. Дар назди муҷассамаи ёдгории шаҳидони Ҷанги Бузурги Ватании солҳои 1941–1945, воқеъ дар мавзеи Панҷшанбеи шаҳри Хуҷанд, маросими гулгузорӣ ва ёдбуди шаҳидон баргузор гардид.
Дар ин бора дафтраи матбуоти раиси вилояти Суғд хабар додааст.
Ба иттилои манбаъ, дар маросим Раиси вилояти Суғд Раҷаб Аҳмадзода, собиқадорони ҷангу меҳнат, намояндагони аҳли зиё, ҷомеаҳои меҳнатӣ, омӯзгорону толибилмони муассисаҳои таҳсилоти олӣ ва миёнаи касбӣ, инчунин хонандагони мактабҳои таҳсилоти ҳамагонӣ иштирок намуданд.
Ҳамчунин дар ин маросим консули генералии Русия дар шаҳри Хуҷанд ва дигар шахсони расмӣ ҳузур доштанд.
Иштирокдорон бар пояи муҷассамаи ёдбуди шаҳидони ҷанг гулҳои тару тоза гузошта, хотираи неки шаҳидону қурбониёни Ҷанги Бузурги Ватаниро гиромӣ доштанд.
Раиси вилояти Суғд зимни суханрониаш таъкид кард, ки собиқадорони ҷангу меҳнат ҳамеша дар маркази таваҷҷуҳи ҳукумат қарор дорад.
Ёдовар мешавем, ки соли равон бо иқдоми раҳбари кишвар барои иштирокчиёни Ҷанги Бузурги Ватанӣ 50 ҳазор сомонӣ ҷудо гардидааст.
Мақомоти Суғд таъкид кард, ки маблағҳои раисҷумҳури кишвар аллакай ба собиқадорони ҷанг дастрас карда шудааст.
Ҳамчунин, аз ҷониби Раиси вилояти Суғд ба иштирокчиён ва маъюбони Ҷанги Бузурги Ватанӣ ба ҳар кадоме 25 ҳазор сомонӣ кӯмакпулӣ супорида шуд. Ба шахсоне, ки солҳои ҷанг дар ақибгоҳ фаъолият намудаанд, ба миқдори 10 ҳазор сомонӣ кӯмакпулӣ расонида шуд.
Дар вилояти Суғд 2 нафар иштирокчии Ҷанги Бузурги Ватанӣ ва 39 нафар шахсони дар ақибгоҳ хизматкарда зиндагӣ мекунанд.