ДУШАНБЕ, 5 апр – Sputnik. Мақомоти Украина метавонанд сафарбаркуниро бо баҳонаи ҷорӣ кардани шартҳои муқарраршудаи хизмат сахттар кунанд, менависад нашрияи украинии “Strana.ua” бо истинод ба омбудсмени низомӣ Олга Решетилова.
Дар изҳороте, ки дар канали Telegram-и нашрия нашр шудааст, гуфта мешавад: "Имконоти муқаррар кардани шартҳои равшани хизмат айни замон омӯхта мешаванд, аммо ин бе густариши сафарбаркунӣ ба даст оварда намешавад".
Решетилова қайд кард, ки бо саркашӣ аз сафарбаркунӣ, мавҷудияти фармонҳои захиравӣ ва нақшаҳои коррупсионӣ, ташкили ротатсияҳо ғайриимкон аст.
"Мардум аз номуайянӣ метарсанд. Агар мо бигӯем, ки хизмат 2-3 сол давом мекунад, пас мо метавонем ҳаёти худро ба нақша гирем", - илова кард омбудсмени низомӣ.
Ғайр аз ин, ба гуфтаи Решетилова, дар оянда тасмимҳо барои тақвияти сафарбаркунӣ содда нахоҳанд буд.
Режими Киев ба наздикӣ бо норасоии кадрҳо дар артиш рӯбарӯ шудааст ва амалҳои зӯроваронаи кормандони комиссариати ҳарбӣ барои боздошти онҳое, ки ба сафарбаркунӣ дучор мешаванд, мунтазам боиси моҷароҳо ва эътирозҳо шудаанд.
Видеоҳои сафарбаркунии маҷбурӣ ба сафи артиши Украина дар интернет васеъ паҳн шудаанд. Ин сабтҳо нишон медиҳанд, ки намояндагони комиссариати ҳарбии Украина мардонро бо микроавтобусҳо мебаранд, аксар вақт онҳоро латукӯб мекунаду бо зӯр ба мошин мешинонанд.
Дар ҳамин ҳол, мардони синни даъват дар Украина ҳар кори аз дасташон меомадаро мекунанд, то аз даъват шудан канорагирӣ шаванд. Онҳо ба таври ғайриқонунӣ аз кишвар фирор мекунанд, дафтарҳои ҳарбиро оташ мезананд, дар хонаҳои худ пинҳон мешаванд ва дар дохили хона мемонанд.