ДУШАНБЕ, 18 фев - Sputnik. Шӯрои уламои Тоыикистон бо нашри як изҳорот гуфтааст, ки мувофиқи далелҳои илмӣ ва дар асоси хулосаи Институти астрофизикаи Академияи миллии илмҳо оғози моҳи моҳи Рамазон дар Тоҷикистон ба рӯзи панҷшанбеи 19-уми феврал рост меояд.
"Дар аксари кишварҳои минтақа низ оғози моҳи шарифи Рамазон рӯзи панҷшанбе, 19 феврал муайян гардидааст", - гуфтааст Шӯрои уламо.
Шӯрои уламо зикр кардаст, ки дар аксари кишварҳои минтақа, аз қабили Миср, Урдун, Сурия, Либия, Ироқ, Эрон, Туркия, Ӯзбекистон, Қазоқистон, Қирғизистон, Туркманистон, Озарбойҷон, Индонезия, Бруней, Уммон, Сингапур, Австралия, Ҷопон, Покистон, Ҳиндустон, Малайзия ва Кореяи Ҷанубӣ моҳи Рамазон аз 19 феврал оғоз мегардад.
Дар ҳамин ҳол, баъзе кишварҳои исломӣ, аз ҷумла Арабистони Саудӣ, Қатар, Баҳрайн, Судон ва Кувайт 18-уми февралро рӯзи аввали моҳи Рамазон эълон карданд. Ба ҳамин хотир миёни мардум овозаҳое пайдо шуд, ки гӯё оғози аввали рӯзи Рамазонро на аз 19 балки аз 18 феврал оғоз мешавад.
Шӯрои уламои кишвар қаблан ҳам гуфта буд, ки дар Тоҷикистон оғози моҳи Рамазон 19-уми феврал хоҳад буд.
Рӯзадорӣ яке аз панҷ рукни Ислом аст, ки барои ҳамаи мусалмонон воҷиб мебошад. Дар давоми тамоми моҳ, аз тулӯъ то ғурӯби офтоб, нафари муъмин бояд аз хӯрдан, нӯшидан, тамокукашӣ ва наздикшавии шаҳвонӣ, дурӣ ҷӯяд. Моҳи мубораки Рамазон — вақти намоз, тавба кардан ва рӯй овардан ба сӯи Худованд аст.
Ҳар рӯзи худро мусулмон бояд аз ният оғоз кунад, ки таъйидкунандаи омодагии доштани рӯза аст.
Интиҳои моҳи Рамазон бо намозгузории умумӣ машҳур аст, ки пас аз он Иди Фитр, ё Иди Рӯза, ки се рӯз давом мекунад, шурӯъ мешавад. Одамон Худовандро шукр мегӯянд, хешовандон ва дӯстони худро меҳмондорӣ мекунанд.
Саховатмандӣ, аниқтараш додани садақа, шарти ҳатмии Иди Фитр аст.
Sputnik Тоҷикистон барои рӯзадорон тақвими онро пешниҳод мекунад. Илова бар ин, барои муҳоҷирони Маскав низ реҷаи рӯзадориро омода кардем.