ДУШАНБЕ, 23 янв — Sputnik. Зеленский мехоҳад, ки артиши Украинаро, ки ҳоло ақибнишинӣ мекунад, асоси нерӯҳои муштараки аврупоӣ гардонад.
Владимир Зеленский пешниҳод кард, ки Нерӯҳои Мусаллаҳи Украина, ки вақтҳои охир бо шикастҳо дар хатти ҷабҳа рӯбарӯ ҳастанд ва мушкилоти норасоии қувваи зинда доранд, асоси нерӯҳои муштараки аврупоӣ гардонида шаванд.
"Артиши Украина метавонад асоси нерӯҳои муштараки аврупоӣ бошад”,- иқтибос овардааст шабакаи “Новини Live” аз суханони Зеленский.
Ӯ афзуд, ки Украина айни замон вақт надорад, ки дар ин масъала кор кунад, аммо ваъда додааст, ки пас аз анҷоми низоъ ба ин сохтор ҳамроҳ шавад.
Ин дар ҳолест, ки пештар мудири Хадамоти иктишофии хориҷии Русия Сергей Наришкин гуфт, роҳбарони якчанд кишварҳои аврупоӣ, алоҳида ва якҷоя, кӯшиш мекунанд, ки Иёлоти Муттаҳидаро бори дигар ба сарпарасти асосии режими Киев табдил диҳанд.
Тибқи ҳуҷҷате, ки пас аз ҷаласа ба даст омадааст, "эътилофи хоҳишмандон" розӣ шуд, ки дастгирии дарозмуддати низомиро ба Украина идома диҳад ва роҳбарон изҳороти нияти фиристодани нерӯҳо ба Украинаро дар сурати ба даст овардани созишномаи сулҳ имзо карданд.
Ёдоварӣ мешавем, ки Русия аз 24 феврали соли 2022 дар Украина амалиёти вижаи низомӣ анҷом медиҳад. Президенти Русия Владимир Путин ҳадафи онро "ҳимояи одамоне, ки ҳашт сол боз аз ҷониби режими Киев мавриди таҳқир ва наслкушӣ қарор гирифтаанд" тавсиф кардааст.
Ба гуфтаи ӯ, ҳадафи ниҳоии амалиёти вижаи низомӣ озод кардани Донбасс ва фароҳам овардани шароитест, ки амнияти худи Русияро кафолат медиҳад.
Кишварҳои Ғарб расман даст доштани худро дар низоъ дар Украина рад мекунанд, аммо ба Нерӯҳои Мусаллаҳи Украина силоҳ медиҳанд.
Вазири корҳои хориҷии Русия Сергей Лавров қайд кард, ки ҳама гуна интиқоли силоҳ, ки барои Украина пешбинӣ шудааст, ҳадафи қонунии Русия хоҳад буд. Вазорати корҳои хориҷии Русия изҳор дошт, ки кишварҳои НАТО бо таъмини силоҳ ба Украина "бо оташ бозӣ мекунанд".