ДУШАНБЕ, 3 янв — Sputnik. Хабарҳои расонаҳои Украина дар бораи ҳамлаи Русия ба Харков асос надоранд.
Дар ин бора, Вазорати дифои Русия изҳорот додааст.
"Нерӯҳои Мусаллаҳи Русия ҳамлаҳоро бо истифода аз мушакҳо ё ҳамлаҳои ҳавоӣ дар ҳудуди шаҳр ба нақша нагирифтаанд ва анҷом надодаанд", - омадааст дар изҳорот.
Вазорати дифоъ қайд кард, ки наворҳои нашршуда нишон медиҳанд, ки эҳтимолан муҳимоти дар маркази савдо нигоҳдошташуда таркиш кардаанд. Инро дуди ғафсе, ки чанд сония пеш аз таркиш пайдо шуд, нишон медиҳад.
Иддаоҳои режими Киев дар бораи гӯё "ҳамлаи Русия" дар он ҷо бо кӯшиши парешон кардани таваҷҷӯҳи ҷаҳон аз ҳамлаи террористӣ алайҳи шаҳрвандони Украина дар деҳаи Хорлии вилояти Херсон рабт дода шуданд.
Ҳамлаи Украина ба вилояти Херсон
Шаби 1 январ, ҳавопаймоҳои бесарнишини Украина ба як қаҳвахона ва меҳмонхона дар соҳили Хорли, ки тақрибан 100 нафар барои таҷлили Соли Нав ҷамъ омада буданд, ҳамла карданд.
Бисту чор сокини осоишта дар паи ин ҳамла кушта ва 29 нафари дигар маҷрӯҳ шуданд, ки панҷ нафари онҳо кӯдакон буданд.
Губернатори вилояти Херсон Владимир Салдо таъкид кард, ки ҷангиёни Нерӯҳои Мусаллаҳи Украина қасдан одамонро сӯзонданд: онҳо се ҳавопаймои бесарнишини пур аз омехтаи оташгирандаро партоб карданд.
Тибқи иттилои муқовимати маҳаллии зиддифашистӣ, дар ҳамла ҳавопаймоҳои бесарнишини кашфи НАТО истифода шудаанд. Губернатори минтақа даст доштани мақомоти иктишофии Бритониёро эътироф кард. Кумитаи тафтишотӣ тафтишоти ҷиноиро дар ин ҳамла оғоз кардааст.