ДУШАНБЕ, 1 дек - Sputnik. Сафири Чин дар Душанбе, Го Чжисюн ин изҳоротро пас аз мулоқот бо вазири корҳои хориҷии Тоҷикистон Сироҷиддин Муҳриддин баён кард, иттилоъ дод манбаъ ба Sputnik Тоҷикистон
Ба иттилои манбаъ, сабаби мулоқоти ахири сафири Чин дар Душанбе бо вазири хориҷии Тоҷикистон ҳамлаи мусаллаҳона дар вилояти Хатлон буд.
Ҷонибҳо вазъи амниятиро дар минтақаҳои марзии Афғонистон баррасӣ карданд.
Ёдовар мешавем, ки чанде пеш президенти Тоҷикистон Эмомалӣ Раҳмон дар ҷаласа бо роҳбарони сохторҳои қудратӣ ва ҳифзи ҳуқуқу тартиботи кишвар вазъи кунунӣ дар сарҳади давлатии миёни Тоҷикистону Афғонистон ва роҳҳои тақвияти ҳифзи он баррасӣ кард.
Бояд қайд кард, ки давоми ҳафтаи охир ду ҳодисаи тирандозӣ ба хоки Тоҷикистон аз он сӯйи сарҳад рух дод, ки дар натиҷа панҷ кас фавтида ва панҷ каси дигар захмӣ шуданд.
Эмомалӣ Раҳмон дар ин ҷаласа амалҳои ғайриқонунӣ ва иғвоангези шаҳрвандони Афғонистонро шадидан маҳкум намуд.
Кишвардори Тоҷикистон ба масъулин дастур дод, ки доир ба ҳалли масъала ва пешгирӣ аз такрори чунин ҳодисаҳои нохуш аз чораю тадбирҳои муассир кор бигиранд.
Бояд қайд кард, ки ахиран дар пайи ҳамлаи афроди мусаллаҳ, ду роҳсози чинӣ дар ҳудуди ноҳияи Дарвоз кушта шудаанд. Гуфта мешавад, ки ҳамла аз самти Афғонистон сурат гирифтааст.
Ҳодиса замоне рух додааст, ки коргарони чинӣ дар яке аз паноҳроҳи хурд дар роҳи навбунёди Қалъаихум-Ванҷ-марзи Рӯшон, кор мекарданд.
Ҳамчунин ҳафтаи гузашта дар натиҷаи ҳамлаи мусаллаҳона, ба қароргоҳи як корхонаи заршӯӣ дар ноҳияи Шамсиддини Шоҳин, ки аз Афғонистон сурат гирифт, се шаҳрванди Чин кушта шуд ва як корманди дигари чинӣ дар ҷараёни тирандозӣ сахт захмӣ шуд.
Ҳамла ахир ба шаҳрвандони Чин дар Дарвоз дар ҳоле сурат мегирад, ки дар пайи ҳамлаи маргбор ба марзи Тоҷикистон бо Афғонистон ва кушта шудани се нафар дар рӯзи 26-уми ноябр, Чин аз шаҳрвандонаш хост, аз минтақаи марзӣ берун шаванд.