ДУШАНБЕ, 12 ноя - Sputnik. Давоми 40 рӯзи даъват ба артиш дар Тоҷикистон, нақша 96% иҷро гардидааст.
Дар ин бора, Вазорати дифои Тоҷикистон хабар додааст.
Ҳамин тавр, бояд гуфт, ки Вилояти Мухтори Кӯҳистони Бадахшон нақшаи пешбинигардидаро дар рӯзи аввали даъват пурра ва дар сатҳи баланд иҷро намуд.
Дар давраи сипаригардида шаҳри Душанбе ва шаҳру ноҳияҳои вилояти Хатлон низ аз иҷрои пурраи нақшаи даъват гузориш доданд.
Ҳамзамон, дар муддати 40 рӯз нақшаи даъват дар вилояти Суғд 89% -ро ташкил дода, то ин дам шаҳру ноҳияҳои Айнӣ, Кӯҳистони Масчоҳ, Шаҳристон, Панҷакент, Истиқлол, Бӯстон, Гулистон ва Спитамен нақшаи гусели ҷавонписарон ба хизмати ҳатмии ҳарбиро пурра иҷро намуданд.
Шаҳру ноҳияҳои тобеи ҷумҳурӣ низ дар ин муддат дар чорабиниҳои даъватӣ фаъолияти назаррас нишон дода, нақшаи пешбинигардидаро наздики 95% иҷро кардаанд.
Аз маҷмуи шаҳру ноҳияҳои тобеи ҷумҳурӣ Сангвор, Нуробод, Рашт, Тоҷикобод, Лахш, Роғун, Файзобод, Турсунзода ва Ҳисор якумин шуда, иҷрои нақшаро пурра таъмин намуданд.
Қобили зикр аст, ки даъвату гусели шаҳрвандон ба артиш дар асоси фармони президент "Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007 ба хизмати ҳарбӣ” ташкилу ба роҳ монда шудааст.
Феълан дар комиссариатҳои ҳарбии вилоятҳо ва шаҳру ноҳияҳои мамлакат, комиссияҳои давлатии даъват таъсис дода шудаанд, ки давоми моҳҳои октябр ва ноябр даъвату гусели шаҳрвандонро ба хизмати ҳатмии ҳарбӣ ташкил менамоянд.
Бояд гуфт, ҳамасола дар Тоҷикистон шаҳрвандони ҷинси марди аз 18 то 27-сола дар ду мавсим, аз ҷумла моҳҳои апрел-май ва октябр-ноябр ба хизмати ҳатмии ҳарбӣ даъват карда мешаванд.