ДУШАНБЕ, 31 июл – Sputnik. Дар Душанбе таҳти раёсати раисиҷумҳур Эмомалӣ Раҳмон маҷлиси ҳукумат баргузор гардид.
Бино ба гузориши хадамоти матбуотии президенти Тоҷикистон, татбиқи барномаи ҳукумати электронӣ, баланд бардоштани мақоми омӯзгор ва тарбияи иқтисоддонон аз ҷумлаи масъалаи муҳими маҷлис будаанд.
Ҳамин тавр, дар кори маҷлис лоиҳаи қонунҳои гуногун аз ҷумла, “Оид ба ворид намудани илова ба Кодекси ҳуқуқвайронкунии маъмурӣ”, “Дар бораи мақоми омӯзгор”, маъқул дониста шуда, барои баррасӣ ба Маҷлиси намояндагони Маҷлиси Олӣ ирсол карда шудааст.
Гуфта мешавад, ки ҳадаф аз таҳияи лоиҳаи ин қонун, баланд бардоштани мақоми омӯзгор, ҳифзи шаъну шарафи ӯ, фароҳам намудани заминаҳои мусоиди рушди касбият ва пешбинӣ намудани имтиёзҳои бештар баҳри онҳо мебошад.
Дар идомаи маҷлис, ҳамчунин, масъалаҳо дар бораи Барномаи амнияти озуқавории барои солҳои 2026-2030 ва дар бораи Барномаи омодасозии мутахассисон аз ҳисоби ҷавонон барои соҳаҳои иқтисодиёт дар солҳои 2025-2029 баррасӣ шуда, аз руи онҳо қарорҳои дахлдор қабул гардид.
Дар фарҷом, Эмомалӣ Раҳмон барои тайёрии ҷиддӣ ба мавсими тирамоҳу зимистони солҳои 2025-2026, соли нави таҳсил ва вусъати корҳои ободонӣ баҳри истиқболи 35-солагии Истиқлоли давлатӣ ба масъулини сохторҳои давлатӣ дастурҳо дод.