ДУШАНБЕ, 5 апр — Sputnik. Афғонҳои муқими Тоҷикистон Наврӯзро бо тантана ҷашн гирифтанд.
Таҷлили ҷашн дар сафорати Афғонистон дар Душанбе баргузор шуд, хабар медиҳад хабарнигори Sputnik Тоҷикистон.
Барои меҳмонон ҳунармандони тоҷику афғон барномаи консертӣ иҷро карданд.
Дар сафоратхона ярмаркаи маснуоти дастии Афғонистон низ ташкил карда шуд.
Сафири Афғонистон дар ин кишвар Зоҳир Ағбар ҳозиринро бо ҷашни Наврӯз табрик гуфта, аз мақомоти Тоҷикистон ва мардум барои ҳифзи суннатҳо изҳори сипос кард.
"Наврӯз як пули иртибот миёни мардумон аст. Боиси ифтихор аст, ки раҳбароне, ки аз мероси фарҳангии ниёгон ва таърихи пуршарафи халқҳои мо огоҳ ҳастанд, тавонистанд таҷлили Наврӯзро ҷаҳонӣ гардонанд", - гуфт ӯ.
Зоҳир Ағбар ҳамчунин қайд кард, ки таҷлили Наврӯз як навъ паём ба ҷаҳониён хоҳад буд.
Ёдовар мешавем, ки Наврӯз имсол дар Тоҷикистон, бахусус дар пойтахт ба таври густарда таҷлил шуд.
Вазорати фарҳанг ва Кумитаи сайёҳӣ тасмим гирифтаанд, ки аз суннатҳои ҷашни бостонии форсӣ баҳри ҷалби сайёҳон ба Тоҷикистон ва афзоиши шинохти Наврӯз дар сатҳи ҷаҳонӣ истифода кунанд.
Аз ҷумла, чорабиниҳои идонаро ҳамоиши байналмилалии "Наврӯзи Душанбе – меҳвари равобити фарҳангиву сайёҳӣ" ифтитоҳ намуд. Дар ин кишвар ҳамчунин як ҳафта ҷашнвораи ҷаҳонии ҷавонони Наврӯз баргузор шуд, ки дар он ҷавонон тақрибан аз тамоми кишварҳои ҷаҳон иштирок намуданд.