ДУШАНБЕ, 12 мар — Sputnik. Дар рӯзҳои таҷлили Наврӯз хатсайри нав дар масири Душанбеи Тоҷикистон ва Кеши Эрон ба роҳ монда хоҳад шуд.
Дар ин бора дафтари матбуоти ширкати ҳавопаймоии Kish Air хабар додааст.
Гуфта мешавад, ки ҳавопаймоҳо аз 18 март ба парвозҳо миёни пойтахти Тоҷикистон ва ҷазираи Кеш шурӯъ мекунанд. Маълум аст, ки парвозҳо ба таври мавсимӣ тарҳрезӣ шуда ва дар баробари афзоиши табодули фарҳангӣ ва гардишгарӣ миёни Эрон ва Тоҷикистон тавассути ҳавопаймоҳои Airbus A321 анҷом хоҳанд шуд.
Қаблан Низомиддин Зоҳидӣ, сафири Тоҷикистон дар Теҳрон низ изҳор дошт, ки ҷазираи Кеш тамоми имконот барои густариши гардишгарӣ дорад ва дар ояндаи наздик парвозҳо ба Душанбе барқарор хоҳанд шуд.
Вай афзуд, ки ҷашни Наврӯз дар ин ҷумҳурӣ бо ширкати кишварҳои дӯст баргузор мешавад ва вазири варзиши Эронро барои ширкат дар ин маросим даъват кардааст.
Ёдовар мешавем, ки Кеш як ҷазира дар соҳили Халиҷи Форс дар Эрон аст. Ин як осоишгоҳи маъмули минтақавии соҳили баҳр аст.