Муҳаққиқони истаравшанӣ зимни корҳои ҷустуҷӯи археологӣ ба дарёфти як қатор ашёҳои таърихии қадимӣ муваффақ шудаанд
Пажӯҳишгарон беш аз бист рӯз ба корҳои ҷустуҷӯӣ дар ҳудуди Маҷмаъаи ёдгориҳои таърихиии “Қалъаи Муғ” машғул шуданд.
Мирзо Олимов, директори муассисаи давлатии Маҷмааи “Қалъаи Муғ” – шаҳри Истаравшан зимни суҳбат ба Sputnik Тоҷикистон гуфт, ки экспонат ва дигар ашёҳои ёфтшуда ба давраҳои хеле қадим ба асрҳои неолит рост меояд.
“Хумҳо, кӯзаҳо, сафолпораҳо ва девору сангҳои дарёфт шуда аз ҳолаташон бармеояд, ки молу ашёҳои қадимии асрҳои 7 - 8 ҳастанд. Маълум мешавад, ки мардумоне дар он асрҳо аз ин гуна ашёҳо истифода мебурданд ва ё барои шаҳрсозӣ аз чунин сангу деворҳо истифода мебурданд” – зикр кард, Олимов.
Маврид ба зикр аст, ки Маҷмааи “Қалъаи Муғ” соли 2002 ба феҳристи ёдгориҳои таърихӣ ворид карда шуд. Солҳои 2017 -2018 он аз навсозӣ шуд ва дар соли 2021 ҳамчун иншооти муҳими таърихӣ ба феҳристи мароси ҷаҳонии ЮНЕСКО шомил шуд.