ДУШАНБЕ, 8 июн — Sputnik. Нерӯҳои мусаллаҳи Украина ба деҳаи Садовое дар вилояти Херсон ҳамла карданд, ки дар натиҷа 22 нафар кушта шуданд.
Дар ин бора раиси вилоят Владимир Салдо дар шабакаи Телеграмаш хабар дод.
"Дар натиҷаи тирборони ҷангҷӯёни Киев дар деҳаи Садовоеи ноҳияи Голопристанский як мағозае, ки дар он шумораи зиёди мизоҷон ва кормандон ҷойгир буданд, хароб шуд", - навиштааст Салдо.
Дар аввал Салдо хабар дод, ки 19 кас кушта ва 5 кас ярадор шудааст. Вай баъдан тавзеҳ дод, ки шумори кушташудагон ба 22 нафар расида, 15 нафар маҷрӯҳ шудаанд, ки вазъи панҷ нафари онҳо вазнин аст.
Тавре РИА "Новости" қайд мекунад, губернатор гуфт, ки нерӯҳои Украина аввал бо мушаки идорашаванда ба мағоза ва дуввумӣ бо HIMARS MLRS зарба заданд.
Нерӯҳои мусаллаҳи Украина пайваста минтақаҳои нави Русияро тирборон мекунанд.
Ҷумъаи гузашта онҳо ба сӯи Луганск дастикам шаш мушаки ATACMS партоб карданд.
Гуфта мешавад, ки аксари мушакҳо аз тарафи нерӯҳои мудофиаи ҳавоӣ зада шуданд, вале баъзеи онҳо ба ҳадафи худ расида, зерсохтори мулкиро тахриб карданд.
Вилояти Херсон дар пайи як раъйпурсӣ дар моҳи сентябри соли 2022 дубора ба Русия пайваст.
Мақомоти Киев қонунияти онро эътироф намекунанд ва тирборони ин қаламравро идома медиҳанд.
Ҳоло 75 дарсади ин минтақа дар ихтиёри Маскав аст ва қисмате дар соҳили рости Днепр, аз ҷумла шаҳри Херсон дар ихтиёри нерӯҳои мусаллаҳи Украина қарор дорад.