ДУШАНБЕ, 5 май — Sputnik. Комиссияи иқтисодии АвруОсиё аз навоварӣ дар қонунгузории гумруки Иттиҳоди иқтисодии Авруосиё гуфт, ки ба такмили минбаъдаи танзим дар ин самт равона шудааст.
Ҷузъиёти ин равандро муовини директори департаменти қонунгузории гумрук ва амалияи ҳуқуқии Комиссияи иқтисодии Авруосиё Нурлан Байназаров зимни ҳамоиши байналмилалӣ дар Алмато баён дошт.
Вай аз ҷумла дар бораи омода намудани лоиҳаи протокол оид ба ворид намудани тағйиру иловаҳо ба Кодекси гумруки ИИАО маълумот дод.
Тағйирот аз ҷумла таҳияи системаи ягонаи транзитӣ, ба монанди истифодаи мӯҳрҳои навигатсионӣ барои пайгирии интиқолро пешбинӣ мекунад.
Ба гуфтаи Байназаров, дар чаҳорчӯби Стратегияи 2025 Комиссия якҷо бо кишварҳои узв тарҳи Созишномаро дар бораи низоми ягонаи транзитӣ таҳия кардааст.
"Ҳуҷҷат принсипҳои асосии фаъолияти низоми ягонаи транзити гумрукии Иттиҳод ва тарафҳои сеюмро муайян мекунад, ки он имконияти истифодаи системаи транзити ИА аз ҷониби кишварҳои сеюмро муқаррар мекунад", - гуфт ӯ.
Лоиҳаи Созишнома дар ҳоли ҳозир дар кишварҳои иттиҳод аз расмиёти дохилидавлатӣ мегузарад, илова намуд вай.
Дар доираи ин иттиҳод ҳамгироӣ ҳадафи асосӣ арзёбӣ гардида, озодии интиқоли мол, хизматрасонӣ, сармоя, қувваи корӣ, сиёсати ҳамоҳангшуда ва сиёсати ягонаи иқтисодӣ таъмин карда мешавад. Феълан узви иттиҳод Арманистон, Белорус, Қазоқистон, Қирғизистон, Русия мебошанд.