ДУШАНБЕ, 16 апр – Sputnik. Дар Файзобод чукричинии як ҷавон ба фоҷеа анҷомид.
Дар ин бора дафтари матбуоти Кумитаи ҳолатҳои фавқулода хабар дод.
Ба иттилои манбаъ, сокини 31 - солаи деҳаи Кӯлобиёни ҷамоати Чашмасори ноҳияи Файзобод барои чукричинӣ ба кӯҳ баромад ва аснои чидани чукрӣ эҳтимол пояш лағжида, аз баландӣ ба поён сарозер шудааст.
Манбаъ меафзояд, мавсуф аз баландии 30 метр ба поин афтода, дар ҷои ҳодиса ҷон бохтааст.
"Ҷасади ӯро ҳамдеҳаҳояш пайдо карданд", - омадааст дар хабари Кумита.
Дар ҳамин ҳол, ин ниҳод зикр намуд, ки борҳо аз шаҳрвандон хоҳиш намуд, ки дар рӯзҳои боронӣ ба кӯҳу дара барои ҷамъ овардани растанӣ, шикору чорвочаронӣ нараванд.
Қаблан, Оҷонсии обуҳавошиносии Тоҷикистон ҳушдор дод, ки рӯзҳои 16 -17 апрелдар баъзе ноҳияҳои кӯҳӣ ва доманакӯҳӣ хавфи омадани сел мавҷуд аст.
Илова бар ин, бинобар боришот дар дарёҳои Ёхсӯ, Қизилсӯ (ҷанубӣ) ва дарёҳои аз нишебиҳои ҷанубии қаторкӯҳҳои Ҳисор ҷоришаванда баландшавии сатҳи об дар назар аст. Манбаъ афзуд, ки чунин хавф танҳо ба шарқи ВМКБ таҳдид намекунад.