ДУШАНБЕ, 2 дек — Sputnik. Холдинги давлатии энержии атомии "Росатом" ба Тоҷикистон дар барқарорсозии реактори "Аргус" кумак хоҳад кард.
Корпорасияи Русия ва Институти астрофизикаи ҷумҳурӣ якҷоя барои аз нав сохтани лоиҳаи таҳқиқотии шӯравӣ ва омода кардани мутахассисон кор хоҳанд кард.
Тавре ноиби президенти АМИТ, доктори илмҳои физикаю математика Гулчеҳра Қоҳирова ба Sputnik Тоҷикистон гуфт, таъмири бино ба анҷом расидааст, ҳоло сухан дар бораи барқарорсозии пурраи реактор ва оғози корҳои тадқиқотӣ меравад.
"Мо ҳоло ба ҳукумати Тоҷикистон барномаи дуюми давлатии барқарорсозии Аргусро пешниҳод кардем. Азбаски худамон имкони барқарор кардани онро надорем, бо мутахассисони "Росатом" ҳамкорӣ дорем. Ин ба рушди таҳқиқоти генетикӣ дар Тоҷикистон ва таъсиси базаи тибби ҳастаӣ кумак мекунад",- гуфт ӯ.
Дар ҷараёни сафари ахири Эмомалӣ Раҳмон ба Маскав созишномаи ҳамкорӣ миёни Фарҳангистони миллии улуми Тоҷикистон ва Донишкадаи Курчатов, ки дар коркарди "Аргус" машғул аст, ба имзо расид.
Реактори ҳастаии пажӯҳиши маҳлули намаки "Аргус" дар Тоҷикистон дар солҳои 1980 сохта шуда буд, аммо ба далели фурӯпошии Иттиҳоди Шӯравӣ ҳеҷ гоҳ ба кор андохта нашуд.
Ёдовар мешавем, ки раисиҷумҳури Тоҷикистон Эмомалӣ Раҳмон рӯзҳои 21-22 ноябр бо як сафари расмӣ аз Маскав дидан кард.
Дар ҷараёни сафар 8 санад оид ба густариши ҳамкориҳо ба имзо расид, аз ҷумла Фарҳод Раҳимӣ, раиси Академияи илмҳои Тоҷикистон, ки дар доираи ин сафар бо ҳамтои худ аз Донишкадаи Курчатов Михаил Ковалчук шартномаи шарикӣ баст.