ДУШАНБЕ, 17 окт — Sputnik. Дар доираи барномаи рушди иқтисодию иҷтимоии ноҳияи Муъминобод барои солҳои 2021 - 2025 татбиқи 123 лоиҳа пешбинӣ шудааст, иттилоъ дод дафтари матбуоти ҳукумати Хатлон.
Ба иттилои манбаъ, тибқи ин барнома аз ҳисоби ҳамаи сарчашмаҳои маблағгузорӣ татбиқи тарҳҳо ба маблағи зиёда аз 275 млн сомонӣ дар назар аст.
Зикр гардид, аз 123 лоиҳаи банақшагирифта шуда, то ҳол дар 10 лоиҳа корҳо ба анҷом расида, дар 13 лоиҳа корҳо идома доранд.
"Маблағи азхудшуда наздики 187 млн сомониро ташкил медиҳад, ки 68%-и барномаро ташкил медиҳад", - омадааст дар иттилоия.
Назорати иҷрои барнома ба комиссияҳои доимии Маҷлиси вакилони халқи ноҳияи Муъминобод гузошта шудааст.
Ҳукумати Хатлон мегӯяд, дар доираи саноатикунонии кишвар, ки аз самтҳои афзалиятноки сиёсати ҳукумат эълон шудааст, дар Муъминобод низ бунёди корхонаҳо афзоиш ёфтаанд.
Аз ҷумла зикр гардид, ки корхонаҳои истеҳсоли маҳулоти ширӣ, нушоба (компот), консерваҳои меваю сабзавот, маҳсулоти нонӣ, гушти мурғ дар шашмоҳа фаъол гардонда шудаанд.