ДУШАНБЕ, 13 окт— Sputnik. Дар заминаи собиқ заводи нони шаҳри Хоруғ минтақаи саноатӣ ва парки технологӣ таъсис дода шуд.
Дар ин бора дафтари матбуоти ҳукумати Вилояти Мухтори Куҳистони Бадахшон иттилоъ дод. Ба иттилои манбаъ, аз заводи мазкур, ки интизор меравад, ба минтақаи саноатӣ табдил дода шавад, раиси ВМКБ, Алишер Мирзонабот ва шаҳрдори Хоруғ, Ризо Назарзода боздид намуданд.
Таъкид шудааст, ки ин иқдом бо мақсади сазовор таҷлил намудани 35- солагии Истиқлолияти давлатии Тоҷикистон ва эълони солҳои 2022 - 2026 солҳои рушди саноат роҳандозӣ гардид.
Таъкид шудааст, ки дар ҳудуди иншооти мазкур ба масоҳати 1,7 гектар замин сохтмони корхонаҳои саноатӣ оғоз карда мешавад.
Нахустин шуда, соҳибкори ватанӣ Рамеш Худоиев дар заминаи минтақаи саноатии мазкур сохтмони корхонаи ҳасиббарориро оғоз менамояд, омадааст дар иттилоия.
Қаблан хабар дода шуда буд, ки то 35-солагии Истиқлолияти давлатӣ дар 30 шаҳру ноҳияи Тоҷикистон паркҳои технологӣ таъсис меёбанд.
Мақомоти Тоҷикистон интизор доранд, ки дар натиҷа шумораи коргоҳу корхонаҳои истеҳсолӣ дар кишвар ба маротиб зиёд мешавад.