ДУШАНБЕ, 24 июля — Sputnik. Хонандагони тоҷик дар даври ниҳоии 3-юмин Олимпиадаи байналмилалии STEM соҳиби 5 медали тилло, 5 медали нуқра ва 8 медали биринҷӣ гаштанд, иттилоъ додааст вазорати маорифи Тоҷикистон.
Тибқ иттилои манбаъ, олимпиадаи мазкурт аз 18 то 23-юми июли соли 2023 дар шаҳри Парижи Фаронса, бо ташаббуси Ҷумҳурии Федеролии Олмон ташкил ва баргузор гардид.
Олимпиадаи мазкур аз фанҳои табиатшиносӣ, математика ва технологияи иттилоотӣ гузаронида шуда, ки дар он ғолибони даврҳои фосилавӣ, ки дар моҳҳои январ ва феврали соли ҷорӣ, байни хонандагони синфҳои 5-11 сурат доир шуд, иштирок доштанд.
Ба иттилои манбаъ, дар даврҳои олимпиада зиёда аз 11 ҳазор хонанда аз 114 давлат, 1200 муассиса ва 900 нафар иштирок намуданд.
Даври ҳузурии Олимпиада бошад, дар Донишгоҳи давлатии Сорбони шаҳри Парижи Фаронса баргузор гардида, дар он, 22 давлат, 96 муассиса, 64 роҳбалад ва 440 нафар иштирокчиён бо ҳам қувваозмоӣ намуданд.
Дастаи олимпии Тоҷикистон, иборат аз 36 нафар иштирокчиён, аз 7 муассисаҳои гуногуни ҷумҳурӣ; 29 нафар аз шаҳри Душанбе 7 нафар аз вилояти Суғд, дар озмуни мазкур иштирок намуданд.
“Дар олимпиадаи мазкур дастаи олимпии пойтахт фаъолона иштирок намуда соҳиби 18 медал гардиданд, ки аз ин шумора 5 медали тилло, 5 медали нуқра ва 8 медали биринҷӣ мебошад”, - таъкид намудааст вазорати маориф.
Ҳамзамон, як нафар хонандаи синфи 6-уми Муассисаи таълимии гимназияи хусусии "Кафолат"-и шаҳри Душанбе Шоҳхоҷаев Абубакр дар сегонаи ғолибони мутлақ байни синфҳои 6 аз фанни математика, мақоми сеюмро ишғол кард.
Маросими қадрдонӣ ва ҷоизасупории ғолибони даври ниҳоии озмун, дар маркази музейи "Илм ва саноат" и шаҳри Париж, ки калонтарин музей дар минтақаи Аврупо ба ҳисоб меравад, баргузор гардид.