ДУШАНБЕ, 11 июл — Sputnik. Бо кӯчонидани ҷангиёни ТТП* ба шимоли Афғонистон ҳеҷ чиз хотима намеёбад, изҳор дошт сафири собиқи Эрон дар Кобул Муҳаммадризо Баҳромӣ.
Ба иттилои Баҳромӣ, ин ки "Таҳрики Толибони Покистон"* ба уҳда нагирифтанд, ки ҳамлаҳо ба Покистонро қатъ мекунанду инчунин бо дигар ифротгароёни хориҷӣ дар Афғонистон робитаро ҳифз мекунанд, оқибатҳои манфӣ дорад.
Идомаи мушкилоти марбути амният дар Покистон аз ҷумлаи натиҷаҳои номатлуб боқӣ мемонад.
Вай афзуд, ки ТТП* ҳамчун омили бесуботӣ метавонад ҳамчун фишанг барои фишор ба кишварҳои Осиёи Марказӣ ва Чин истифода шавад.
Тавлиди буҳронҳои иҷтимоӣ, фарҳангӣ ва амниятӣ дар шимолии Афғонистон аз паёмадҳои дигари кӯчи ҷангиён ба шимол арзёбӣ мегардад.
Ин дар ҳолест, ки ба хилофи иддаои толибҳо, ки гурӯҳҳои террористӣ аз хоки ин кишвар ба кишварҳои ҳамсоя таҳдиде нахоҳанд кард, Таҳрики Толибони Покистон* аз қаламрави Афғонистон ба Покистон нуфуз кард ва кишварҳои дигари атроф борҳо нигаронии худро аз ҳамчунин хатарот баён кардаанд.
Қаблан сухангӯи ҳаракати толибон*, Забеҳуллоҳ Муҷоҳид, расман изҳор дошта буд, ки бино ба як тавофуқ бо вазири корҳои дохилии Покистон, Рано Сановулло ҷангиёни ТТП* аз марзҳои Покистон ба вилоятҳои дурдасти Афғонистон интиқол хоҳанд ёфт, то нигарониҳои Исломободро аз байн бурда бошанд.
*-ҳаракатҳои мамнӯъ ва таҳти таҳрими СММ