ДУШАНБЕ, 23 июн — Sputnik. Раиси вилояти Суғд Раҷаббой Аҳмадзода бо ҳайати вилояти Хатлон бо роҳбарии муовини Раиси вилояти Хатлон Акрам Сулаймонзода дидору мулоқот кард.
Таъкид шудааст, ки муовини Раиси вилояти Хатлон Акрам Сулаймонзода ва ҳамроҳонаш бо мақсади иштирок дар нӯҳумин Ярмаркаи байналмилалии савдо "Суғд-2023" ба вилояти Суғд омадаанд.
Мақомоти вилояти Суғд хабар додааст, ки барои иштирок дар Ярмаркаи байналмилалии савдо "Суғд-2023" аз вилояти Хатлон беш аз 25 ширкату корхонаҳои истеҳсолӣ иштирок хоҳанд кард.
Раиси вилоят дар ин дидор таъкид намудааст, ки Ярмаркаи байналмилалии савдо "Суғд-2023" ва форуму чорабиниҳои марбут ба он бо мақсади ҷалби сармоя ва дарёфти роҳҳои нави ҳамкорӣ ва шарикони рушд, инчунин содироти маҳсулоти ватанӣ ба хориҷи кишвар доир мегардад.
Тарафҳо дар ин дидор таъкид карданд, ки дар доираи баргузории ярмарка соҳибкорони вилоятҳо ҳамкориро боз ҳам мустаҳкам намуда, барои таъмини рушди иқтисодиёти кишвар якҷо заҳмат мекашанд.
Ёдовар мешавем, ки рӯзҳои 23 — 24 июн дар шаҳри Хуҷанд бо ибтикори Мақомоти вилояти Суғд нуҳумин Ярмаркаи байналмилалии савдо "Суғд-2023" баргузор мегардад.
Қарор аст дар ин чорабинӣ наздик 500 нафар меҳмонон аз минтақаҳои кишвар ва давлатҳои хориҷӣ иштирок намоянд.