ДУШАНБЕ, 13 июн — Sputnik. Русия дар бӯҳрони геополитикӣ, ки ҳоло ҷаҳон бо он рӯбарӯ аст, дар самти рости таърих қарор гирифт. Дар ин бора Анатолий Антонов, сафири Русия дар Амрико зимни суханронӣ зимни чорабиние дар сафорат ба муносибати Рӯзи Русия изҳор дошт.
"Кишвари мо собит кард, ки шарики боэътимоди ҳар касест, ки омода аст дар асоси эҳтироми мутақобила ва тавозуни манфиатҳо ҳамкорӣ кунад", - гуфт дипломат.
Ба гуфтаи Антонов, вақт довари ҳақгӯст.
Дипломат афзуд, бидуни Русия, ки дорои иқтидори бузурги инсонӣ, бойтарин манобеъ ва таҷрибаи таърихии он аст, мушкилтарин масоили байналмилалиро ҳал кардан ғайриимкон аст.
"Бозгашт ба принсипи тақсимнопазирии амният ягона роҳи пешгирии низоъҳо дар оянда аст", - афзуд Антонов.
Дар ин маросим, ки дар толори тиллоии бинои намояндагии Сафорати Русия дар Ню-Йорк доир шуд, кормандони сершумори намояндагиҳои дипломатӣ ва атташеҳои низомии кишварҳои ИДМ, Осиё, Африқо, Амрикои Лотинӣ, Мексика, Ховари Миёна ва давлатҳои дӯст аз Аврупо ҷамъ омаданд.
Дар зиёфати расмӣ, аз ҷумла, сафирони Чин, Тоҷикистон, Туркманистон, Ӯзбекистон, Сербия, Босния ва Ҳерсеговина, Лаос, Малайзия, Малӣ, Судон ва Шри-Ланка, инчунин кордори корҳои Беларус ва Эритрея дар ИМА ҳузур пайдо карданд.