ДУШАНБЕ, 28 май — Sputnik. Дар тӯли қариб се даҳсолаи мавҷудияти Қӯшунҳои сарҳадии Тоҷикистон, ҳангоми иҷрои вазифаҳои хизматӣ 150 нафар хизматчиёни ҳарбии ҷузъу томҳои марзбон ҷони худро қурбон кардаанд.
Ин нуктаро раисҷумҳури Тоҷикистон, Эмомалӣ Раҳмон дар ҷамъомад ба муносибати 28 май - Рӯзи сарҳадбонон ва 29-умин солгарди таъсисёбии нерӯҳои сарҳадии кишвар таъкид кард.
"Мардуми тоҷик ва ҳукумати мамлакат номи нек ва ҷасорату фидокории онҳоро ҳамеша гиромӣ хоҳанд дошт", - гуфт президент.
Вай илова намуд, ки ҳукумат бо дарназардошти хизмати содиқонаи хизматчиёни ҳарбии Қӯшунҳои сарҳадӣ, то ҳол 129 нафар афсарону сарбозон бо мукофотҳои давлатӣ ва рутбаҳои олии ҳарбӣ қадрдонӣ кардааст.
Ҳамчунин, ҷиҳати беҳтар гардонидани шароити иҷтимоӣ 1700 оилаи афсарони мақомоти сарҳадӣ бо манзили истиқоматӣ таъмин карда шудаанд.
Раванди беҳсозии шароити хизмат ва зиндагии сарҳадбонон аз ҷониби Ҳукумати мамлакат минбаъд низ идома дода мешавад, ваъда дод Эмомалӣ Раҳмон.
Вай дар идома изҳор дошт, ки вазъи мураккабу пешгӯинашавандаи минтақа ва ҷаҳон водор месозанд, ки дар самти ҳифзи сарҳадот ва таъмин намудани амнияти ҷомеа ва давлат тадбирҳои иловагӣ амалӣ карда шаванд.
Президент аз марзбонон хост, ҳамеша ҳушёру зирак бошанд, сатҳи касбият ва донишу маҳорати худро баланд бардоранд, Ватан ва ҳар ваҷаб марзи онро дӯст дошта, ба савганди ҳарбӣ, давлат ва халқи Тоҷикистон содиқ бошанд.