ДУШАНБЕ, 4 май — Sputnik. Тоҷикистон омода аст, ширкатҳои Қазоқистонро ба коркарди конҳои ангишт ҷалб кунад.
Дар ин бора Шералӣ Кабир, вазири саноат ва фанновариҳои нави Тоҷикистон дар ҳамоиши ду кишвар дар Остона изҳор дошт.
Ба гуфтаи вай, дар ҷумҳурӣ корхонаҳое, ки ба истихроҷи захираҳои мавҷудаи ангишт машғуланд, кам нестанд. Ин соҳа ҳанӯз ба қадри кофӣ тараққӣ накардааст.
Тибқи маълумоти Вазорати саноат, дар кишвар беш аз 40 кони ангишт кашф шудааст, ки захираи геологӣ 14 млрд тонна арзёбӣ мешавад.
"Мо миқдори хеле кам - то 3 млн тонна ангишт истихроҷ мекунем. Аз ин рӯ, мо омодаем бо ширкатҳои шумо дар коркарди конҳои ангишт дар Тоҷикистон ҳамкорӣ кунем", - гуфт Шералӣ Кабир.
Вай қайд кард, ки фарқи конҳои ангишти Тоҷикистон аз конҳои Қазоқистон дар он аст, ки ин кишвар дорои неруи баландсифат ва ангиштҳои коксшаванда аст.
"Мо медонем, ки дар мамлакати шумо металлургия хеле босуръат тараққӣ мекунад ва дар Тоҷикистон истеҳсоли ангишти коксшаванда барои шумо оптималӣ ва хеле фоиданок мебуд", - гуфт вазир.
Илова бар ин, ӯ афзуд, ки захираҳои бузурги антрасит мавҷуд аст, ки он ҳам як унсури муҳими рушди истеҳсолоти кӯҳӣ ва металлургӣ мебошад.