ДУШАНБЕ, 29 янв — Sputnik. Барандаи маъруфи телевизиони Русия, Николай Дроздов пас аз афтидан дар кӯча дар шуъбаи эҳёи бемористон бистарӣ шудааст, хабар медиҳад "Москав 24".
Ба иттилои манбаъ, Дроздов ҳангоми бозгашт аз кор ба хона дар наздикии бинои Донишгоҳи давлатии Маскав ба замин афтода, бо шикасти устухонҳои сина ба беморхона афтодааст.
Табибон дар пайи ташхис муайян кардаанд, ки 8 қабурғаи ӯ шикастаанд. Таъкид мешавад, ки дар ҳоли ҳозир ӯро аз шӯъбаи эҳёгарӣ ба палатаи алоҳида интиқол додаанд.
Гуфта мешавад, ки пизишкон гач назадаанд, тасмим гирифтаанд, ки бидуни гачбандии қафаси сина, пайванди устухонҳоро интизор мешаванд.
Ба гуфтаи кормандони тиб, бемор бояд тақрибан як ҳафта дар беморхона бистарӣ бимонад, аммо барои барқароршавии пурра ҳанӯз барвақт аст. Тибқи пешгӯиҳо, устухонҳои шикаста пурра давоми ҳудуди 2 моҳ барқарор хоҳанд шуд.
Николай Дроздов зоологи рус, доктори илмҳои биологӣ ва профессори факултаи ҷуғрофияи Донишгоҳи давлатии Маскав аст. Ӯ ҳамчун барандаи барномаи телевизионии "Дар олами ҳайвонот", сайёҳ ва тарғибгари илм маъруф аст.